فوزي عبد الرحمان : توا الناس الكل تعرف اللي السيد الرئيس لا يفهم أبجديات الإقتصاد

كتب : فوزي عبد الرحمان

باهي.. توا الناس الكل تعرف اللي السيد الرئيس حفظه الله لا يفهم أبجديات الإقتصاد و التعامل الإقتصادي.

و نعرفو اللي إسم الله عليه ما يسمع كلام حد.. و لكن بربي ما ثما حد يقلو اللي راهو الفيديوات متاعو يدورو العالم في دقيقة و اللي كلامو على أموال القروض اللي تتصب في حسابات الفاسدين البرّا.. راهو أولا كلام ما ينجمش يكون صحيح و كلام ما يجيش على لسان رئيس دولة، و ثانيا يعطي فكرة خايبة ياسر على رئيسنا و ثقافتو الإقتصادية و ثالثا يزيد يشوه صورة تونس..

و زيد هاك الصورة متاع رئيس جمعية البنوك و الكلمة اللي قالها و هاك المجهود اللي عاملينو 24 بانكة.. وقت هاك القيمة (قال الرئيس تاريخية! ) ينجم يعطيها واحد وحدو من جملة المساهمين و في مؤسسة واحدة.. جمعية البنوك صحة ليهم دبروها.. حتى حد ما هو قاعد يقول لهم حقائقهم الأربعة.

لو كان يقعد الكلام هذا بيناتنا موش مشكل.. نعرفو بعضنا و ما ناش براينية.. أما الفضائح هاذم يدورو في العالم.. و الله موش معقول.
ما ثما حد يكلم الرئيس و يسمعو؟؟