برهان بسيس : ” منى الشاذلي ما تزيد شيء على الورتاني و لا زعيّم و لا ميساء باديس …غير …”

كتب الاعلامي  برهان بسيس ما يلي :

السلام عليكم… ربي يرزقنا بالمطر….
رأي شخصي بخصوص الاعلام التونسي،
آراء عديدة في شكل عدوى ساذجة تهلل وتكبّر لمرور فنانا التونسي المتألق محمد الجبالي مع الاعلامية المصرية منى الشاذلي على إحدى القنوات المصرية… فرصة استغلها البعض للانتصاب كمقدمي دروس بخصوص الاعلام التونسي وتهافت مستواه مقارنة بالإعلام المصري…..
سامحوني.. شفت اللقاء المذكور… واضح منى الشاذلي ما تعرف شي على محمد الجبالي… شاخو عليه كيفاش قلد فريد وقلد جورج وصوف.. ما فهمتش وينو الإنجاز العظيم الي يلزم يتحاكم عليه الاعلام التونسي الي عادي كي يتعدى عندو محمد الجبالي ولد بلادو يفتح معاه اكثر من زاوية متع حديث باعتبار يعرف عليه كل التفاصيل في حياتو العامة والخاصة…. مني الشاذلي الي طلقت الحوارات السياسية بعد أن تم تأميم الاعلام المصري ما تزيد حتى شي على الهادي زعيم او نوفل الورتاني او ميساء باديس او أميمة العياري او يوسف البحري، غير عقدة المختلف خاصة كي يكون مصري تخلينا نجلدو رواحنا……
الاعلام التونسي بكل عيوبو ومساؤو ما هوش محتاج ان يصحح مسارو بناء على نصائح مدارس الاجندات متع الدول الصديقة والشقيقة… إمارات كانت او قطر او اشقاءنا في مصر…
يكفي انو بكل مشاكلو وحكاياتو انو إعلام ما زال ما هوش تابع للمجلس الأعلى للقوات المسلحة… فيه الخايب وفيه الباهي اما حد لا ينجم يقول انو موش حر…. و هاذيكة ضريبة الحرية…..
تحبو مني الشاذلي وشايخين علي حوارها مع محمد الجبالي، هنيئا لكم بشكارة كاملة فيها عمرو أديب واحمد موسى وبقية الجوقة…..
ما يسالش وقفة تأمل نعرفو فيها انو مقارنة بكل العالم العربي الي إعلامو موزع بين انو يكون فرع من وزارة الخارجية او وزارة الدفاع او جهاز الاستخبارات… الاعلام الي في تونس وفيه زياد كريشان وهيثم المكي والياس الغربي ومعز بن غربية ومريم بلقاضي وخلود المبروك وملاك البكاري وزياد الهاني ولطفي العماري ومحمد بوغلاب وغيرهم بالعشرات يبقى بغض النظر انك تتفق مع أسماءو او تختلف الاعلام الحر الوحيد في الخارطة العربية من المحيط الي الخليج……
يزيو من جلد الذات يرحم والديكم……