الدكتورة الفة يوسف :”….”الكرز” خايبين وسرّاق”
كتبت الدكتورة الفة يوسف تدوينة جاء فها :
كيف تتربّى من اللي انت صغير بالسبّ والضّرب…
كيف لا أمّك لا بوك يعطيوك محبّة لا مشروطة…تسمع: “شبيك بهيم؟ مصطّك؟ مغط كيف دار أخوالك؟ ماصط كيف عموماتك؟ ما اللي جبتك ما شفت خير..يا وجه الهمّ…”
كيف تعدّي صغرك وأمّك وبوك يتعاركو بسبب ومن غير سبب، وساعات يجيك انت الطّشّ…
كيف تتهان في المدرسة، وأصحابك يتنمّرو عليك، وما يحترموك كان كيف تبدأ في باندة، وتولّي انت بيدك تسبّ وتلعن وتضرب…
يلزمك جماعة تتحامى فيهم وبهم، تنجّم تولّي الكرة حياتك والجمعيّة هي اللي تعطي معنى لوجودك…تنجّم تحسّ روحك من المسلمين الصّحاح والباقي الكلّ كفّار، تنجّم تتصوّر أولاد حومتك الزّواولة باهين والأخرين “الكرز” خايبين وسرّاق…تنجّم تحسّ أولاد جهتك “رجال” والأخرين “قننّوات”…
أصلا مخّك، وبالخصوص قلبك ييدا “مفورماتي” على منطق: أنا/ وجماعتي الباهين…والأخرين بيهم وعليهم…
وفي الحقيقة، انت ماكش خايب/ ولا باهي…انت نتيجة لأحداث وتركيبة معيّنة…والأخرين موش خايبين/ ولا باهين…هوما نتاج لأحداث وتركيبة معيّنة…
وهانا نقصّرو في الوقت مع بعضنا لين نموتو الكلّ…
