التيكتكوز ضحى العريبي تثير ضجة :” بطلت القراية بعد ماجبت 3 معدل في التاسعة و توا ندخل في 20 مليون في الساعة “
في برمو فكرة سامي الفهري تم تمرير ومضة قصيرة للتيكتكوز ضحى العريبي اثارت من خلالها ضجة كبرى و الهبت مواقع التواصل الاجتماعي بين من يعتبرها مثال يحتذى بها و بين ما يعتبره عنصر مدمّر للمجتمع و يكرّس لثقافة الجهل و كسب المال .. حيث تم اكدت العريبي انها تحصلت على معدل 3 من 20 في السنة التاسعة و غادرت مقاعد الدراسة لتتوجه الى التيكتوك الذي اضحى مصدر رزقها و من خلاله و به تضخ اموال طائلة قرابة 20 مليون في الساعة … من هنك كثر اللغط و اللغو و حولها
معاذ بن نصيب الباحث في العلم الاجتماع كتب مت يلي :”
انك تخرج في التلفزة وتحكي وتقول راني جبت معدل 3 وهاك علاه بطلت القراية مالتاسعة وتو ندخل في عشرين مليون في الساعة …
ماهياش حاجة واو وتخلينا نكونو منبهرين بانجازاتك وإلي أعظمها تجيب راجلك معاك في فيديو وتبدى تقشتل فيه وتعاود، وإلا تحطو قدامك وتبدى تسخسخ فيه وهو عامل جو …
نتخيّل المرى التونسية عملت انجازات أعظم من هكة ببرشا ، المرى المش قارية والقارية على حدّ السواء ، المرى التونسية إلي لقيناها في أكبر المناصب الوطنية والعالمية.
مانيش نلوم فيك بقدر لومي لبعض من هالشعب (وإلي أنا ننتمي ليه) إلي خلق منك شخصية أما ورقية للأسف قابلة للتلف في كل وقت ، هالشعب الفاضي شغل ويدخل يتفرج فيك كيفاه تكوّر براجلك جيست باش يضيع شوية وقت ، هالشعب إلي يعيش فراغ نفسي واجتماعي ماهوش لاقي ما يعمل هاك علاه عايش معاك …
لو كان جا عندنا شعب واعي شوية ، نأكدلك لا إنت ولا غيرك تتكاثروا …
“
رأي اخر من التعليقات اكد ما يلي :”
موش كان هي تدخل في أموال طائلة من لاشيء ! المصيبة إنك تشوف بعض التعليقات يهاجمو فيها لأنها جابت 3 معدل ويقولو مهيش مثال لصغارنا وقيمة المرأة أو الإنسان ما تتقاسش بالفلوس .. هنا يكمن صراع الأجيال أو الصراع بين الجهل والحقيقة ! في الثمانينات والتسعينات تقرى 8 سوايع تتكون تخدم 8 سوايع تلم ثروة في 2023 الأمور تغيرت تقرى وتخدم 12 ساعة ما تلقى شي وتكوينك الأكاديمي لا ينفع قولا وفعلا ميراك حد بينما تيكتوكور 0 تكوين تشطح تغني متصالحة مع السذاجة المجتمعية تلم ثروة وما عليها كان تتلهى ببشرتها والمظهر العام متاعها وهذا ما يسمى الإستثمار في سذاجة المجتمع ! المجتمع لما يشوف هذه الظاهرة ويتصدم كيف تقلو راني ندخل في 20 مليون في الساعة يتفكر روحو لازمو يخدم عليهم 3 سنوات وهو صايم لا ياكل لا يشرب لا يتفرهد لا يشوف روحو في المراية مبعد ياخو بيهم شوية حديد وياجور ويعاود من جديد ! مفعول الصدمة يخليه يهاجم الظاهرة لي صنعها بصبيانية وحماقة .. لذلك أعتبر تصريح “منحبش نجيب صغار خاتر فما circulation في المرسى” لي ضحكو عليه التوانسة أهم تصريح تقال في برنامج تلفزي تونسي ! وموش نتوما لي تضحكو عقولكم تضحك عليكم .. يعني متسكرش عين ولدك والا بنتك غلى الحقيقة وتقعد تكذب عليه وتقلو أقرا على روحك باش تعيش مرتاح ! كيف انت ب متمررش الجهل متاعك للأجيال لي بعدك . أما إذا مزلت معندكش صغير ووضعيتك المالية متدهورة كيما حال الأغلبية الساحقة من الشعب فأفضل مشروع تعملو في حياتك متجيبش صغير حماية ليه من الإحساس بالظلم والقهر والهوان والإهانة على خاتر باش يولي عمرو 25 سنة في 2050 والإحتباس الحراري باش يزيد وحرارة الكوكب باش تتضاعف والهوة المجتمعية باش تتضاعف .. هذا هو عصر السرعة ! نسيت أحد الأبواب لي بش يلتجئلها الشعب التونسي ولي هي الضربة القاضية “عند ربي خير ” أي صحيح ممتاز مالا معادش تتتكلم !”
