الاعلامي حسّان بلواعر ينشر قصة طفل متوحّد أطردته المدرسة

نشر الاعلامي بقناة نسمة الجديدة حسان بلواعر  تدوينة جاء فيها:

إبني متوحد .. و ليس مجرما ..

حلم كل أم تشوف اني ولدها يقرا و ينجح ..تتفوخر بيه في العايلة .. و في كل بلاصة ..

كل عدد باهي ياخذوا و كل شهادة تعلقها .. هوما الحاجات اللي على خاطرهم تضحي

هذا كان حال مدام فاطمة عمناول .. ولدها محمد أمين تولد متوحد ..تعبت عليه و قرات ..لين تمكن انو يدخل عمناول للمكتب بطريقة عادية..يتسمى ادماج ..و كان متميز و متألق و جاء الأول..( اهوك الكرني قدامكم )

عادة هالطفل النابغة ..كيفاش في تونس نجموا نخليوه يزيد يتأقلم و ينجح ..

طبعا حتى شي .. لا مرافقة لا والو .. نخرجوه مالمكتب ..

برافو تونس ..يعطيك الصحة .

اكاهو .. تجربة محمد أمين مع المدرسة وفات بعد عام ورّى فيه للعالم ..انو التوحد مش جريمة .. بالعكس .. متى لقاو العناية الوليدات و البنيات قادرين على انجاز المستحيل ..

الجمعة اللي فاتت كانت العودة المدرسية .. لكن محمد أمين ما رجعش يقرى ..

و اكتفات الدولة بأني عطاتو بطاقة إعاقة و هو فقط كان يستنى في اني توفرلو مرافقة بش يكمل يقرا ..

محمد أمين و برشة كيفو .. يعاقبون في بلادنا كالمجرمين .. وهم فقط اطفال متوحدون و متميزون ..