الاستاذة سنية الدهماني تكرّم معينتها المنزلية ” خلتي نوى هي اديا و هي ساقيا “

كتبت الاستاذة سنية الدهماني تدوينة قالت فيها :

خلتي نوى….

17 سنا معايا في الدار….

اكثر من علاقة اجيرة و اجيرتها، هي تخدم على روحها و انا نخلص فيها…قصة محبة كبيرة

هي اديا هي سقيا تعرف تراكني اكثر مني و تعتبر روحها تقضي في دارها

و كيف يوجعني راسي تبدى اكا حدها كيف الام لحنينة

في المولد بحكم الي امي مسافرة ما كليتش العصيدة البيضة الي ناكلها عندها كل صباح مولد

نحكي مع خلتي نوى البارح قلتلها شفت كي تغيب ماما المولد ماهوش مولد ….حتى العصيدة البيضة ما يعملها حد كان هي

سكتت خلتي نوى….

و الصباح كيف جات دخلت للكوجينة كلمة لا

انا لاهية في بيتي و هي عيطتلي….و نلقاها محضرتلي طبق كيما تشوفو فيه…..قتلي ما يقعد في قلبك شي !

اش بش نقول غير الله لا ينحيك عليا خلتي نوى و ربي يشدلك في صحتك

بجاه ربي قولو “يكثر خيرك” لكل خلتي نوى عندكم في الدار….الكادحات الي شاء قدرهن انهم يسهلونا حيا”