الكاتبة فاتن الفازع :” غلقت 44 عام و احتفلت بعام جديد صارلي فيه اكتئاب موسمي “

كعادتها صارحت الكاتبة فاتن الفازع متابعيها  من خلال تدوينة  اكدت فيها ان احتفلت بعيد ميلادها ال44 . و قالت :”

أربعة وأربعين سنا باش نغلقهم نهار السّبت ، وكي العادة باش نشعّل شمعة وحدة ونحتفل بنعمة عام باش ينزاد لحياتي ويزيدها أغلاط وهشاشة و ديفووات وحاجات ما يشبهوش للعظمة اللي يحبّوا يسوّقولها بائعي السّعادة ، آما فما عام انزادلي شفت فيه الشمس زرقت ، والسماء لمعت والغيوم غيّمت ، ضحكت فيه وبكيت ، صارلي فيه اكتئاب موسمي ، عرفت فيه الحبّ في أقصاه ، صغرت فيه بعشرين سنا ، كبرت فيه بأربعين ، كتبت فيه كتاب ، قعدوا فيه الناس اللي نحبّهم حيّين ، ومستعدّة للّي جاي بقلب ينبض ، بالضوّ ، الموسيقى ، الحياة ، الدّموع ، الخذلان ، وكلّ ما يكوّن الحياة … نهار السبت باش نغلق أربعة وأربعين سنا بقلب مراهقة ، ومخّ يخطى ويصيب و ما يوزنش بلاد آما لوكان عندي كلمة نحبّ نقولهالكم ، ما اتّبعوا ثنيّة حدّ ، ما تتخذوا حدّ قدوة ، إيّاكم تسمعوا كلام بيّاعة الأوهام ، كان جات دمعة سيّبوها ، كان جات ضحكة أضحكوها ، وكان جات غلطة أغلطوها… ما فينا حدّ تولد بشهادة حسن التصرّف ، ما فينا حتّى حدّ قدوة للآخر آما الضوّ ، الشّمس ، الأمل ، الحبّ ، الفرحة حقّنا وماناش مسلّمين فيهم “