مايا القصوري :”هذا تقتاتو مازال فلاقو “
كتبت الاستاذة مايا القصوري ما يلي :
علاش التعجب هذا الكل و السبان هذا الكل و قتلي الفيديو هذي هي تمظهر ( يمكن قصووي) جاي في تسلسل منطقي للتجارة بالدين و بمظاهر التدين و الورع و الرياء الي نشوفوا فيه منذ سنوات على انستغرام و الي الاغلبية تساندوا و تحبوا و تباركوا فتبدا تزايد في الماشاء الله و القلوب متع الحب على اي محتوى يحكيلهم زعما على الدين ، و لو بالكذب و لو تفاهات من نوع الدعاء هذا خمسة مرات يجعلك تتزوجين خلال هذه السنة ، و لو هالرياء بالتدين ( شوفوني نصلي شوفوني نتصدق شوفوني نسب في الناس الي تقول الي التدين مسألة خصوصية و فردية و الي فقط المجتمعات المتخلفة و السكيزوفرينية هي الي تشجع التدين كظاهرة جماعية تكون اقرب للهوليقانيزم و تلقاها قشور من غير فوندو التمسك فيها بظاهر الشعائر و اذاعتها هو اهم حاجة ؟؟) عاد قلنا و لو هالرياء يبدى مولاه الي يحب يسوق لشخصو كسلعة تحبها الجماهير بش ينجم يبيع سلعتو و الا برنامجو يبدى هوُ يعرف روحو يكذب و المتلقين يعرفوه يمثل اما هانا الكلنا نلعبوا في دور الورع …علاش باهتين و قتلي برشا ملي عاملين رواحهم باهتين اليوم هوما الي جعلوا الدين و التدين بضاعة مثل غيرها ..رداء سحري يمكنك بش ترجع الشعبية متاعك الي طاحت و يمكنك بش تكبر الصفحة متاعك بش تنجم تبيع مليح السلعة متع تكبير الارداف و الا متع الدورات التكوينية متع حب روحك المغلفة في الروحانية الرخيصة و الا متع بيع العبايات و المبخرات و حبة البركة و التلبينة الخ الخ … علاش متعجبين و هذي بضاعتكم ردت اليكم في اطار سيستام ليبيرالي كل شيء فيه بضاعة و خاصة مشاعركم الخصوصية متع التدين و الحاجة الي الروحانيات و الي العمرة فيه و الحج ولاو حاجة فرجوية معدة لاستهلاك المتفرج في اطار اتوبروموسيون حتى كان انت في ممارستك اليومية ما عندك حتى علاقة بالمنظومة الدينية و محتواها ؟ انو الدين و التدين اصبحوا مواد استهلاكية مسألة دعمتها اغلبية من الناس الي اليوم يسبوا في الفيديو هذا ..و هوما نفسهم الي سبوا الناس الي قالوا مثلا راهو انو الدعاء الي بينك و بين ربي منطقيا ما عندو ما يعمل كيف تهبطهولي ستوري و الا منشور خاطر وقتها يولي الهدف منو مش التقرب لله بل التقرب للكومونيتي و للمتابعين عبر اقناعهم بانك انسان متدين معناها انسان محترم …مدام الدين و التدين في بلداننا مزالو ما ولاوش مسألة خصوصية فردية و مدام التدين مزال كفالة متع سمو اخلاقي لازم الشخص في مجتمعنا يظهرو بش يتحصل على الاحترام و مدام النساء خاصة لازمهم يشهروا هالتدين بش يخف عليهم التنمر متع الوصم بالعهر الي هو ساهل ياسر في مجتمعاتنا المريضة …فالفيديو هذي تقتاقو في انتظار فلاقو
