ياسين العياري يهاجم قيس سعيد: أنت لست في منزلة التلميذ بل في منزلة المتسول

هاجم النائب بالبرلمان ياسين العياري في تدوينة على صفحته الرسمية على فايسبوك اليوم الخميس 7 أكتوبر 2021 رئيس الجمهورية قيس سعيد ، قائلا <> أنت لست في منزلة التلميذ، بل أنت في منزلة المتسول، المتسول الي يتقبح في الي يحبهم يسلفوه باش يلقى ما ياكل.>>

وأضاف العياري <>كنت سببا في فشل كل من سبقوك للعامين الي فاتوا، لكن المرة هذه لن تجد في من ستمسح الفشل : ما عندكش مؤهلات لفهم دور قيادي تنفيذي، عزلت تونس عزلة مخيفة، الشعبويات تطرب القلوب المعبية كره لكن لا تحل ربع مشكلة للبلد، بالعكس تقضي عليها و اليوم أنت المسؤول الوحيد>>.
وفيما يلي نص التدوينة :

لا سيدنا، أنت لست في منزلة التلميذ، خلي نوضح لمعاليك، أنت في منزلة المتسول، المتسول الي يتقبح في الي يحبهم يسلفوه باش يلقى ما ياكل.
فهم يغزروله يقولوا شبيه هكة هذا؟ عليه العوض و منه العوض! هوما تو في منزلة بين المنزلتين : نعطوه زوز صوردي شفقة على اليتام و إلا طز فيه كان هو ما خممش فيهم بش نخمموا أحنا؟ ياكلوا التزمير و يحليو بالإرادة الشعبية! الفقر و العنطزة!
للأسف سيدنا، تنجم ترد 5000 شخص مليون و 800 ألف بفشلومة، بالنسبة للفلوس، الأمور أكثر تعقيد..التفشليم موش بنفس السهولة.. كيفاش نفسرهالك؟
لا، ما تنجمش تخرج مرسوم محصن فيه إلي عندك بليار و 800 مليار.
تي علاش نفسرلك أصلا! إنت ما فهمتش علاش الطماطم ما ترخصش رغم إنك قلتلها أرخصي بش تفهم هذه؟ برى أكاكة.. هاني نزمر مع الي يزمروا و صحة الحصان يا قوم.
كنت سببا في فشل كل من سبقوك للعامين الي فاتوا، لكن المرة هذه لن تجد في من ستمسح الفشل : ما عندكش مؤهلات لفهم دور قيادي تنفيذي، عزلت تونس عزلة مخيفة، الشعبويات تطرب القلوب المعبية كره لكن لا تحل ربع مشكلة للبلد، بالعكس تقضي عليها و اليوم أنت المسؤول الوحيد.
إن شاء الله إعادة بناء ما أنت تخرب ما تكونش غالية برشة.