مقداد السهيلي لنوفل الورتاني : «وقتاش باش تخلصني راو الحرام ما يثمرش»
نشر الفنان مقداد السهيلي اليوم السبت 22 فيفري تدوينة بعنوان “وعادت حليمة” طالب فيها المنشط نوفل الورتاني بخلاص مستحقات مالية و في ما يلي نص التدوينة :
وعادت حليمة …
ياسي نوفل … يظهرلي سكت عليك برشة … برشة … وانت عمال زايد على قدام
ياسيدي وقتاش باش تخلصني في الخدمة اللي خدمتها معاك ؟ تمشيش تنكر
وتقول ما تفاهمناش عالخلاص !!! والا ما خدمش معايا جملة !!!
طلبتك سبعين مرة … بعثتلك ميساجات … كلموني اللي يخدموا معاك عشرات
المرات باش نجيك لديما لاباس وإضحك معنا وقلتلهم الحكاية … وانت عامل روحك
موش هنا مولى الدار !!! تنسي وتكذب ويرجعولي المساعدين متاعك في التليفون ..
وعملت معايا حاجات أخرى نحشم باش نحكي عليها على خاطر ماعندها حتى علاقة
بالحرفية الاعلامية اللي عبيتولنا روسنا بيها ….
شوف خويا … راني انا كتبت هذا على خاطر مالقيت معاك حتى حل … وصبرت عليك ياسر …وراو الراس
مايقصو كان ربي عز وجل … وراني طالب حقي مانيش نطلب فيك والا في غيرك
خويا الدنيا ماهي دايمة لحد … وفمة ربي … وماك تعديت بغصرات وريت الموت
وتعرف اش معناها عرق الناس … راهي شركة كاكتوس ماهيش مستحقة
ليا انا … وراو الحرام مايثمرش … كان باش يوبخك ضميرك شوية وتفهم روحك
مرحبا … ونقعدوا وخيان كي البارح كي اليوم … وكان باش تكمل تدز النح
أرفع شكواي للذي رفع السماء بلا أعمدة ودعوة المظلوم ليس بينها وبين الله حجاب
وراك ماكش الاول والا الآخير اللي نعقد فيه النوارة ويغدر … راني استانست وما
عادش يحوك فيا الضرب .
وربي يعينك
