مريضة بالسرطان تصرخ :” قررت نخلي الكونسار ياكلني و نستسلمو و لا نستسلم للذل متاعكم و قلة انسانيتكم يا طبّة صالح عزيز.

تاة مصابة بالمرض الخبيث  تكتب #معاناتها في “مستشفى صالح عزيز”  مع أشباه الأطباء و أشباه الممرضون الذين لا يشرفنا إنتمائهم للمهنة تقول
” موش أنا كنت قابلة المرض و شايخة و أنا باش نعمل عملية؟
أنا اليوم قررت نخلي الكونسار ياكلني و مستحيل نعمل اي خطوة للعلاج و هذا الكل بفضل سبيطار صالح عزيز.
اليوم عطاوني موعد باش نرقد مشيت مالفجاري و القاعة معبية كدس ناس باش ترقد الي جاية من قابس و الي جاية من سليانة و كل حد من بر خذاو علينا ورقة الموعد و قالونا تستناو 11 نعيطولكم قلنا ميسالش سخانة و مرض التعب مخلوف.سي الرحال وقتاش يجي؟ 13 بالطبيعة بعد ما كمل خدمتو في الكلينيك قاللهم هاتو الدوسيات نعطي فيها قرار.
14:30 بداو يعيطو بعثوني الطابق الثالث.قالولي لا ماكمش باش ترقدو نحنا عطيناكم موعد باش نقولوكم راهو لازم تعملو تحاليل و تصويرة عالصدر و روحو توا نطلبوكم!!!!! بالله و الكلام هذا علاش ماتقولوهش ملول قلك هذا الي فما و الي ما عجبوش يطير.
فتكم بالحديث وخيتكم عندي اعاقة في ساقي و عندي 26 يوم نزيف من جرة فيبروم في الرحم و دم 8 و سكر 0.71 نهار بعد نهار في الطبيب.
وليت نبكي و قلتلهم نحب نقابل هذا الرحال الي يحط في البرنامج. فما فرملي قلي توا تضربلو على الطيارة و واحد قالي تروح و تسكر فمك كبشت و من فم ايا دخلني اش يقلي؟” ياخي تحب ترقد تأكل و تشرب على حساب السبيطار؟ قتلو دكتور و النزيف راني شربت الدوايات الكل شي ؟ قلي “شنوة المشكلة انزف”
فما طبيبة قالت شبيها هذي تبكي و تمخط.
يا دكتورة هذي الي تبكي و تمخط كانت باش تعمل في طفل الانبوب و هذا دواء مالكنام و اهوكا كل ماتحل الفريجيدار تلقاه تقوم تبكي خاطرها موش باش تستعملو ؟
هي الي تبكي و تمخط يا دكتورة قريب تبيع دبشها باش حضرتلكم ا رم و سكانار الي قلتولي لازم يحضرو في جمعة
هذي الي تبكي و تمخط يا دكتورة رملة كيف تقولولها أمشي لعين زغوان باش تعمل بيوبسي و أمشي للمنزه خوذ بروتاز فيسع و أمشي في نهارهم صبهم في كنام حمام الأنف تصرف 60 د تكسيات خاطر ماتنجمش تطلع في الكار و الميترو و متسلفتهم زادة.
هذي يا ملائكة الرحمة الي تبكي و تمخط داخت في الطاق الثالث مالنزيف و السخانة و دموماتها في القاعة و ترد و ما تلفتلها حتى طبيب و لا فرملي كان من الناس الي كيفي هزوني.
هذي الي تبكي و تمخط تسيب علاها كلب بوليسية مربي في حومتها قريب كلاها نهارت الي جاتك أنت و دكتور بن ناصر نهار الجمعة وقتها خارجة 4 و نصف متع الصباح لولا لطف ربي لين رديت دم مالفجعة
هذي الي تبكي و تمخط المرض قضالها على حلم الامومة
هذي الي تبكي و تمخط عروسة عام يا دكتورة رملة مارات شي مالدنيا
هذي الي تبكي و تمخط يا انسة رملة اليوم دخلت تضحك لموعد العملية خرجت و قررت تستسلم للمرض و لا تستسلم للذل متاعكم و قلة انسانيتكم.
#الكونسار ينجم يكون رحيم بيا أما انتوما لا

مقالات ذات صلة

زر الذهاب إلى الأعلى
error: Content is protected !!