مايا القصوري “:يا ناس ..راكم مش فاهمين ..ايجاو نفهموكم بش تاقفوا معانا وًما تخليوهاش بينا”

كتبت الاستاذة مايا القصوري ما يلي :

خلاف الحزن و الاكتئاب وًاحساس الظلم الي قاعدين نقوموا بيه كل صباح دفلة في افامنا و حجرة على قلوبنا ..خممناش علاش نحن شعوب تتضرب من دون غيرها بالكرتوش كيف الارانب و تتهجر و تتمرمد و العالم يغزر و يفتي و ساعات بش يطير الملام يستنكر ؟؟ علاش الفلسطينيين يصير فيهم هكا من ثمنية وًاربعين وًكان شيئا لم يكن ؟ خاطر توازنات جيوسياسية ؟ فما منو ..اي اما لكن هاو الصين و كوريا وًروسيا في تمبك هالتوازنات الجيوسياسية اما جرب انت مس شعرة من مواطنيها البلدان هذي …القوي يهاب و الضعيف يداس و يستنجد مثلنا بالعالم ..اغزرولنا يا ناس ..راكم مش فاهمين ..ايجاو نفهموكم بش تاقفوا معانا وًما تخليوهاش بينا احنا ووليداتنا..شوفوا تصاورنا و نحن نبكيو و صررنا على راسنا خارجين من ديارنا حفايا..شبيكم نسيتوا منظومة حقوق الانسان الي كنتو تحكيولنا عليها …و تكلمت حتى انجيلينا جولي و بيلا حديد الي عندهم ملايين متابعين …الدهس متواصل..خاطر الضعيف يداس وًالقوي لا ..كوريا و روسيا و الصين باش قويين ؟ بالقراية و العلم ورالاختراع و الصناعة و الفلاحة و التكنولوجيا…الحرب هذي بش توفى نهار كيف ما وفات سبعة وًستين و الانتفاضات و العالم بش يكون مختلف بعد الحرب هذي لما ولدته من تجييش لكلا المعسكرين ..المعسكر متاعنا الي شرب حتى الثمالة الحزن و الذل متع التصاور ستتعالى فيه نسب الحقد و معسكرهم هوما الي بش يزيد صرامة في اعتبارنا الآخر الي يشكل تهديد لسلمه ..الاهم بالنسبة لي هو التفكير في هذا المستقبل و محاولة الاحتواء الناجع لاحساس الحقد الي حسيناه بش الحقد هذاكا ميكونش سلاح ندوروه ضد ما بقي منا ويطلعنا اجيال يجهلها التطرف …مثلا من المهم توعية الشباب عقلانيا بماهية الصراع ..الصراع مش ديني بل استعماري..ما نستعملوش زادا المعركة الحالية بش نزيدو نقوييو من رفض الاخر الي هي حاجة موجودة عندنا فانو يكون تونسي يهودي عمل موقف مخزي مش معناها نعملوا حملات على اليهود التوانسة وونقولو “ما هم الا يهود ” ..انو محترفي حقوق الانسان طلعوا صفر ما يعنيش اننا نوليو نقولوا فكرة حقوق الانسان و فكر الانوار نحطوها في الزبلةً بل بالعكس خاطرها تنجم تكون وسيلة ناجعة لنضالنا…انو الغرب طلع عندو دوبل ستندار ما يعنيش اننا نزيدوا نتكمشوا و نوليو نرفضوا تعلم اللغات خاطر نحن أمم تابعة في العلوم مجرد مستهلكين لابتكارات الناطقين باللغات الاجنبية..القوة الي تخلي حد ما يجرء عليك لاهي بالشعارات لا بالشاش لا بالتصاور لا بشعر درويش …القوة ما تجي كان بالعقل مش بالمشاعر الفياضة..بالقراية و العلم و الاستثمار فيهم …مكانش فان غدنا لن يكون الا أفدح من حاضرنا