مايا القصوري :”متكونش يد القطوسة الي الجماعة تحب تهز بيها قسطلا”

علّقت الاستاذة مايا القصوري على حكم قضية اغتيال الشهيد شكري بلعيد :

“هذا تعليق عبد المجيد بلعيد خو شكري بلعيد على الحكم الصادر في قضية المجموعة الاولى من منفذي اغتيال شكري..

فما مجموعة ثانية فيها كمال العيفي و مصطفى خذر و قيادات اخرين متع النهضة قضيتها مزالت جارية و هي القضية المربوطة بالجهاز السري و الغرفة السوداء كان تتفكروا…

فبربي تريثوا قبل التعليق و لو اني نعرف الي الموضوع حساس و موجع و مثير للمشاعر …

مش خاطر النهضة في اطار التلاعب الدائم بالمعلومات و بالمشاعر و بالناس و بالبلاد و بالدماء خرجت بيان تقول فيه الي الحكم يبرئها

و مش خاطر بعض خماستها ممن عرفوا بالكذب الدائم ( منهم واحد كذبتو متع هاك العام الي قال للشباب اخرجوا في الليل الجيش يحميكم وقتلي هو متخبي في دويرتو تسببت في ضربان هالشباب بالكرتوش و موتهم) ..

مش خاطر المجرابين همزتهم مرافقهم فلازمك اتبعهم..ديما ننصح بالتريث سواءا كان الموضوع داخلي او دولي ..

مناش في سبق صحفي ..هاكم تشوفوا من حكايات الاغتصابات في فلسطين من الجانبين كيفاش طلعت مجانبة للحقيقة ..

و هاكم شفتوا كيفاش الحابورة الي صارت و الكذب و التلفيق على اتفاقية صندوق قطر للتنمية الي هي في الاخر متعداتش و نعرفوها ملول مش بش تتعدى وحتى الي عملوا الحملة يعرفوا اما عندهم حسابات يصفيوا فيها

…هاكم شفتوا صنع الابطال الكاذب كل يوم في بلادنا الي ولاو الناس الكل فيها ضحايا حرية التعبير المنتهكة وًلو كانوا من الثلابين المزيفين للحقائق و المتهافتين يمجد نضالاتهم على حرية التعبير

من كانوا البارحة من مراقبي حرية تعبير زملاؤهم في القنوات و غيرها و في تمبك الدرك كانوا يدعون لمسايرة الموجة خاطرها ياسر عالية حسب تعبير احد ابطال اليوم ( و لو اني نقعد ضد العقوبة السجينة في جرائم الثلب و التشهير )..

قداش بش نحكي نهارت الي نحكي ؟ اتعفف عن الولوغ في هذا خاطر فما ناس نحشم في عوضهم …مخ الهدرة..التريث بش متكونش يد القطوسة الي الجماعة تحب تهز بيها ما تحسبه قسطلا”