شهادة مؤلمة للبطلة الافريقية للقفز بالزانة درة محفوظي : ” حقرونا و مرمدونا و فضحونا “
كتبت البطلة الافريقية الحائزة على الفضية ففي المسابقة الافريقية الاخيرة درة محفوظي على صفحتها ما يلي : “
المرة هاذي الكاس فاض، فاض خاتر اول مرة نشارك في بطولة افريقيا و ما نسمعش النشيد الوطني التونسي و انا على منصة تتويج منافسة القفز بالزانة، سواء الذهب جبتو انا و الا سرين البلطي.
حاجة تغيض و توجع، ما نعرفش كان اللي وراء الكراسي حاسين باها.
الحمد الله ، عملت اللي عليا، بذلت اقصى جهدي و ما روحتش اديا فارغة، روحت بالفضية في ظل غياب تام لاي نوع من انواع التحضيرات اللي طلبتهم من الجامعة، و زيد مشيت من غير الزانات متاعي خاتر في الجامعة العزيزة متاعنا اقصو تذكرة السفر قبل باقل من 24 ساعة و على compagnie ما تهزش الزانات و هم على علم بذلك. و ما حبوش ابدلو شركة الطيران بتعلة فارق الثمن (1000د) .
معناها انا مضحية عام كامل و يعلم بيا كان ربي بين خدمة و entrainement ، على حساب راحة بدني، و عايلتي و حياتى باش فالاخر ما يستخسروش فيا مليون كان انجم يضمن الذهب.
مع العلم انو كما قلت ، طلبت من الجامعة من اول السنة تربص تحضيري واحد لمدة 10 ايام فقط قبل البطولة الافريقية و ما راعني الا اني وقت قربت فترة التربص اقولولي “ما عناش فلوس”.و انا نشوف في بقية les athlètes من تربص الى تربص ، و انا بطلة افريقيا اللي معملين عليا نجيب الميدالية الذهبية في بطولة افريقيا ما قراوليش حساب .معناها جامعة ما عندها حتى stratégie budgétaire ، الفلوس اللي تدخل تتصرف الكل و مبعد احلها ربي. نهار سردوك و لا 100 نهار دجاجة و قالهالي رئيس الجامعة بيدو “كان جيتنى وسط العام على stage راك مشيت”. معناها انا مطالبة نعمل البرمجة متاعي على وقتاش الفلوس تتصب !!
ايا سيدك ما مشيتش stage، برا نترانا في رادس كالعادة… اسف، منظمين فيه البطولة العربية لالشباب. ما عندكش الحق تدخل لمدة اسبوع. (في تونس الكل عنا tapis perche كان في رادس). معناها انا زوز اسابيع قبل البطولة الافريقية ما نجمش نعمل séance technique محترمة.
وفات البطولة العربية، رجعنا باش نتراناو ، ايا سيدك هاذي اغرب الغرايب : كيف يبدا فما ماتش foot بين زوز فرق تونسية في ملعب كرة القدم برادس ، ملعب العاب القوى اسكر ، و l’équipe nationale d’athletisme ما انجومش نتراناو و نحضرو بطولة افريقيا اللي مزال علاها اسبوع. معناها فريق كرة قدم محلي ابجل من équipe nationale d’athlétisme : تحيا الرياضة على تونس 7.
حاسيلو ، هذا مختصر المعاناة متع بطلة افريقيا في القفز بالزانة “سابقا” ، بفضل الجامعة الموقرة، و الي من غير الميدالية الفضية متاعي الي ما صرفو علاها حتى مليم راي تونس جات قبل الاخيرة في الترتيب العام بين الدول الافريقية. و مبعد اجي يخسر عليك “الله غالب”.
الله غالب على الجامعة التونسية لالعاب القوى اللي وصلت الى الحضيض و قامت تحفر، و الي كان مش باش تعمل remise en question و كل واحد يخدم فاها اقيم الاداء متاعو و الله لا تقيملنا قيامة.
