شهادة شابة تونسية مصابة بكورونا
تداول نشطاء مواقع التواصل الإجتماعي تدوينة لشابة تونسية مقيمة بالخارج تحدثت عن تجربتها مع فيروس كورونا
الرسالة وصفها البعض رسالة الصدمة و هذا نصها
أنا حاملة للفيروس كورونا..عايشة في فرانسا في اوروبا، وهنا شهر لا جال لا ماسك لا ميزان سخانة…عمري 32 نأكل صحي ونترانا أقل شيء بمعدل نهارين في الجمعة ومعندي حتى مرض منيش ممراضة ونادرا ما ناخذ ادوية..نحب نقلكم الشباب الي كيفي ويمرض شنوة يصيرلو ثماش ما تفيقو شوي على وضعكم تونس بش تفنيوها…
السخانة كينو عندك بركان في بدنك عينيك متنجمش تحلهم خاطر يحرقو مالسخانة …فمك الكلو التهابات مالسخانة وشربة الماء مجرد شربة الماء تحرقك ..معندكش شاهية الماكلة وديما تحس روحك بش ترجع حتى لو مكليت شيء…
تاخو حربوشة دوليبران كل ستة سوايع فقط فقط …غيره تحت الدوش والماء البارد والا الكمادات الي يلزمك تحطهم وحدك خاطرك معدي…عضلات بدنك الكل توجع بدنك معادش يهزك بش تهز يدك لراسك توجعك متنجمش تسيطر على بدنك تحس بدنك خارج عالجاذبية وبالطبيعة جريان الجوف و الطريق للتوالات تشوفو جبل يكيدك …
راسك عندك موزيكة الباي تضرب نهار وليل فيه تالمو يوجع لين معادش تنجم تقيم الوجيعة من عشرة…النفس متاعك تسمعو وهو داخل وتسمعو وهو خارج ويوجع برشا مجرد انك تتنفس توجع الهوا كينو حاجة معبية بالشوك في حلقك ويتعدا ويوحل في رواريك الي تحسهم معبين بالتراب …
الكحة كاغط احرش يحكلك في حلقك والقصبة الهوائية وتوجع الكرش والصدر ..صدرك تقول حاط فوقه حاجة ثقيلة كل مرة تزيد تثقل وتهبطلك على رواريك وقلبك…الكلام مجهود جبار تلقى روحك مجبر عليه بش تتعامل مع الطبيب وبش تطمن عايلتك…
في ظل الحرب الي في بدنك تلقى روحك أنت تطمن في عايلتك وتهزلهم في المورال خاطرهم مرعوبين عليك…ويخرج فرخ يقلك أنا صغير فرحان بشبابو و تو يتعدى كالقريب وهو يشيش ويتكيف ووو…اللهم قد بلغت اللهم فاشهد ربي يعلم بحالي كيفاه ركزت وكتبت ها الكلام فيقو راهو مش غريب راهو مش لعبة…
عندكم شهادة متاع عبد يعيش في جد أم الكورونا شدو دياركم مفماش دواء والدولة معندهاش امكانيات شيماء بن سعيد
