مايا القصوري :” منظومة العبودية المصرفيّة يلزمنا لكلنا نحاربوها “
نقلت الاستاذة مايا القصوري تدوينةو تقاسمتها مع معجبيها و متابعيها على صفحتها جاء فيها : .. منظومة #العبودية_المصرفيّة هاذي يلزمها تكون العدو الأول للجميع ومحور الحرب القادمة لكل مشروع سياسي يطلب منا الإحترام :
” فمّا “شباب” يخدمو و يدخّلو فلوس من العالم الكلّ
يدخل يخدم خدمة تلقاها services عن بعد !
مثال الخلاص متاعها في حدود 20$!
كيفاش بش تخلص في فلوسك !!!!
في ظلّ غياب PayPal !
تنجّم تعطي رقم IBAN تونسي متع البانكا متاعك في تونس ، و إذا السيّد إلّي خدمتلو وافق ، يوصلوك لتونس ، لكن هذا يحتاج ما بين جمعة و حتى لجمعتين…
نقولو وصلوك الفلوس ….
البانكا تقصّلك 50 دينار بعنوان ,
Commission minimum d’un virement étranger !!!
Peu importe le montant !!!
إيجا نحسبو البيعة : الخدمة إلي خدمتها انت ب 20$ هي قرابة 60 دينار !
و بالطبيعة انت كيف يوصلوك لتونس يقصّولك منهم عمولة البانكا 50 دينار ، تقعدلك كان 10 دينارات
حقّ باكو كريستال و قهيوة و دبوزة ماء في حيّ شعبي !
و تصوّر روحك تخدم freelance من الصباح مع برشة أشخاص ، في العالم و خدماتك الكلّ ب 20$ و 30$ و 40 $!!!
تعمل نفس الحكاية ، تلقى روحك انت تخدم و البانكا تخلُصْ أكثر منّك و تفدّ و ما تصوّر شي …
تولّي تخمّم تتحيّل ، و علاش تتحيّل ؟؟؟
خاطرك تولدت في دولة يحكموها “ناس” متحيّلين و بالقانون !!!
و تقوم تبدا تخمّم في حلّان حساب PayPal أو Payoneer…باش تلمّ فلوسك و تهرب من العمولة الزائدة متع العصابة و وقتها تصبح انت مخالف للقانون ، و تولّي فاسد …
هذا حكيت فيه على free-lance… و نفس الحكاية تنطبق على مجالات أخرى …
تونس “بقوانينها” الحاليّة تصنع “مواطنين فاسدين بامتياز”
تونس دولة مصنّعة، للمتحيّلين …
هذي صورة لمثال عن العمولة متع البانكا!
هنا نلاحظو مواطن تونسي قدّم خدمة صغيرة قيمتها بالدولار حوالي 100$, و كي وصلوه لتونس 297 دينار، البانكا فرحت بيه … و قصّولو 50 دينار!
الحمد الله سلّكها ، قعدتلو تفتوفة
منقول عن زياد تبر
