الممثلة سوسن معالج : ” نبوس الراسبين في الباك و ال campus عبارة عن “section poubelle “
مبروك صديقاتي و أصدقائي نجاح وليداتكم و بنياتكم فارحين ديما انشالله .
و حبيت خاصة و الأهم بالنسبة ليا ، نبوس كل الراسبين و الراسبات ونقاسمهم تجربتي مع بكالوريا الآداب:
نجحت ب10 فاصل 0,7 ، سكوري طلع حموم ما يهّز كان للشريعة في رقادة ولا الحقوق في الcampus والي كانت في عهدي ( انشالله ماعادش توا ) عبارة على section poubelle تلمّ أضعف المعدلات من أضعف الشعب (طبعا نقصد شعبتي الآداب و الاقتصاد والتصرف)
عملت مطلب للوزارة باش ندوبل و نعاود الباك
لعلي أظفر بمعدل أعلى يضمنلي توجيه ما خير قالولي الcas هذي عمرها لا صارت ، و ممنوع ، و مش ممكن و سكروها في وجهي ، حطيت في قلبي ، خدمت على روحي ، لميت فلوس ، عملت التكوينات و التربصات الي حبيت عليهم
و شديت ثنيتي ، تعلمت برشة صنايع و عملت على روحي و الحمدالله وصلت لوين حبيت .
فقط باش تعرفو الي الباك مش المفتاح الوحيد للنجاح
و الشهادة الجامعية مش الثنية الوحيدة لتحقيق الأحلام .
خفو على صغيراتكم يهديكم ، راهو مش الكلنا خلقنا ربي للقراية طويلة المدى ، فينا زادا الي خلقو ربي فنان ، صنايعي ، عامل يدوي ، رسام ، تاجر ، صايغي إلخ إلخ …
ما نجحتش في الباك ما يعنيش أنك إنسان فاشل بل يعني أنك ربما عندك ثنية أخرى في الحياة تستنى فيك ، تبّع قلبك تو يدلّك عليها 
