الممثلة سوسن معالج :”سعيدة ببداية تعافيكم مالهلواس…و تحبو أي حاجة هاني هوني”
وجهت الممثلة سوسن معالج تدوينة بنقد لاذع و ساخر الى ما اسمتهم ثوريي الديجتال جاء فيها “
أبطال الديجيتال الثوريون الڤارحون
هاو فيهم شكون استفاق مؤخّرا و يتساءل علاش عملنا مجلس تأسيسي و ضيعنا هاك الوقت الكل و علاش ثلاثة رؤساء مؤقتين في جرّة بعضهم ، و شبينا ما فقناش الي الجماعة قاعدة تلعب ع الفلوس في البلاد و شبينا ما وقفناش للمؤسسات العمومية
حبيت نقلّهم ما فقتوش خاطر كي حبينا نفيقوكم قلتولنا انتم تجمعيون و بنعليون و أيتام فرانسا
و حتى كي بدا الارهاب ووصلنا للاغتيالات حشيتو روسكم في الرمل و قلتو قوى أجنبية تكرهنا و تكره ثورتنا و الشعب مسلم و لن يستسلم يا عملاء يا بايوعة يالي تكرهو الخوانجية خاطر تحبو بن علي ، يعني باقي العيب فينا .
مشات انتخابات و جات انتخابات و انتوما تنفخو في صورة الخوانجية حتى كان ربحتو منهم حاجة ، للي تنحاو
كيف تنحاو وقتها ولاّو خايبين و فقتو اليوم فجأة الي هوما زكّموكم و كذبو عليكم ؟
و مازلتو عاملين أبطال و تنظّرو ع العباد بالهلاوس و المخططات الي شلقتو بيهم فجأة بعد 12 سنة ثورة بالضبط بعد ما تنحاو الخوانجية ثم زدتو استشعرتو فجأة بعد ما تشدّ الغنوشي، بالي لعلّ و عسى ثم شكون لعب لثورتكم أيام بعد إندلاعها و انتوما وقتها صغار و أبرياء ؟؟
هكّة تعملو الأولاد ؟
مش قلتو وقتها ثورتنا ثورة شباب ما يمسّها حدّ؟
زايد توا الحديث، الكيلو كرموس بخمسة و عشرين دينار ، الله يرحمنا ، حبيت نجاوبكم فقط بتذكير الي وقتها انتوما قاعدين تستحلاو في القعدة ع المية و ع الربيع
و يا ويلو الي يقلق قعدتكم أو يستدعاكم للتفكير العقلاني و يخرجكم م الزهو و الغناء والعياط و الشعارات بالفالج ،
يولي ثورة مضادة و إسلاموفوب و ولد ليلى بن علي و تجمعي علماني ماسوني متآمر يخلص بالدولار من عند أجهزة لضرب الثورة.
على كل ، سعيدة ببداية تعافيكم مالهلواس و تلاشي الخدع البصرية من أمام أعينكم
صحيتكم
نحبكم آني وايز
تستحقو إجابات على أسألة أخرى في أي موضوع من 2010 و حتى قبل ، 2006 ، ثورة الخبز ، فترة بن علي ، بورقيبة إلي تحبو أي حاجة تسهل عليكم قراءة التاريخ بربي هاني هوني
مانيش شباب كيفكم أما إنجّم نعاونكم في القراية
