بما أنّي وصلت لعمر النبوّة ههههه وعام السناا عدّيت فيه برشة وقت نخمّم في العالم ، وصلت للاستنتاجات التالية اللي تقعد رأي شخصي ونسبي :

1/ كلمة اللي ما يقتلناش يقوّينا غالطة ، فمّا جزء يقوّينا وجزء يقتل حاجة فينا
2/ السّعادة لحظات في الحياة ، الرّضا عن النّفس والسّلام الدّاخلي والطّمأنينة هوما الحالة اللّي ينجّم يوصللها الإنسان بعد برشة خدمة على روحو ويعيش بيها آما موش السّعادة
3/ الدّموع ما يحشّموش وإنّما ينجّم يفتخر بيهم العبد على خاطرو مازال يحسّ وساعات بكية باهية تفرهد خير من ضحكة
4/ المبادئ ماهاش صالحة لكلّ مكان وزمان انت والموقف اللّي تتحطّ فيه وانت وكيفاش تطوّرت
5 / الكفتاجي أبنّ ماكلة في الدّنيا ( هاذي مالثوابت والقناعات الراسخة)😂
6/ موش كلّ شيّ وجعنا في حياتنا وكل التجارب الخايبة باش تتحوّل لدروس ، بعضها اي آما البعض منها باش يقعد وجيعة منسيّة في قاع أرواحنا تتحيّر ساعة ساعة
7/ الابتعاد قدر المستطاع على الجماعة اللّي تنظّر وهوما ما يكسبوش شعرة تعاطف وعندهم نفس القواعد يحبّوا يحكموا بيهم على جميع المواقف
8/ النّاس اللّي ما يتعاشروش ماعندهمش بلاصة في حياتي ، والعشرة مقياسها حسن العشرة موش عدد السنوات
9/ النَّاس اللي يحبّوا يعطيوا راي في كلّ شيّ ويتدخّلوا في حياة غيرهم من غير حدّ ما طلب منهم ذلك قمّة في قلّة التربية ومازالوا ناقصين ياسر
10/ الترفّع على الأنفس المريضة وتكمّل تشقّ ثنيّتك بخطى الشباب المطمئنّ car les gens méchants envient et haïssent c’est leur manière d’admirer