الشعيبي يكشف خفايا وتفاصيل قضية القروي وكيف ثبتت عليه تهمة خطيرة جعلت القضاء يرفض اطلاق سراحه
كتب رياض الشعيبي الناشط السياسي والقيادي في النهضة سابقا ومؤسس حزب البناء الوطني تفاصيل عن قضية نبيل القروي والسبب الذي جعل الجهات القضائية ترفض مطالب الافراج عنه ..وبين ان هناك من يعلم بهذه التفاصيل لكن الاغلبية ترفض الفصاح عن ذلك وكشفها كل لسبب معين.
وقال الشعيبي:
وبين ان القضاء وجده متورطا في الفساد وتبييض الاموال اضافة الى تهمة ثالثة اخطر منهما.
القصة الكاملة لقضية تبييض الأموال… وماخفي كان أعظم
شوفو موضوع نبيل القروي معقد، على هذاكا اليوم ما سيبوشو…
وفي الحقيقة ها الوصف (معقد) يستعمل عادة للي يخاف من قول الحقيقة أو حتى جزءا من الحقيقة…
كثيرين يعرفون تفاصيل الموضوع، لكن لأنهم ماعندهمش الشجاعة أو لأن مصالحهم مهددة، تلقاهم ساكتين أو متهربين من قول الحقيقة بادعاء أن الموضوع معقد.
نبيل القروي عنده شركة في لكسمبورغ وبالشراكة مع طارق بن عمار وشركاء أجانب. أسس قناة نسمة بمقتضى هذه الشركة، لكنها تعرضت لبرشة صعوبات باش تموّل نشاطها وكانت على أبواب الافلاس والغلق وتحويل بثها من تونس الى مصر في اطار قناة جديدة.
فجأة ودون سابق انذار تحسنت أمور القناة وولات من افضل القنوات في تونس بمسلسلاتها التركية العديدة والغالية وببرامجها المتنوعة وبمقرها الي تحول من شارع محمد الخامس الى رادس، من عمارة صغيرة الى مقر أشبه ما يكون بالفيرمة.
شنية الحكاية ؟!!!
باش نفهموا هالتحول يلزمنا نشوفو في الفترة هذيكا اش صار ؟؟
التحول هذا في الوضعية المادية لنسمة ارتبط بظهور قوة سياسية جديدة اسمها ” نداء تونس”. بل يرجع الفضل لنسمة في ابراز هالحزب ودعمه بقوة والدعاية ليه. طبعا هذا ينجم يكون مفهوم وقتلي نلقاو نبيل القروي واحد من أوائل المؤسسين للحزب ومن أقربهم لزعيمه الباجي قايد السبسي.
لكن شنوة علاقة هذا بتحسن الوضعية المالية لقناة نسمة. الأصل أن الي يلتزم في حزب تتضعضع أموره المادية على خاطر يقوى عليه المصروف موش تتحسن أموره !!!
مع نبيل ونسمة الوضعية مختلفة !
نبداو من الوضعية الحالية باش نحاولو نفهمو اش صار وقتها:
كيف نشوفو نسمة بعد تحسن وضعيتها، اش نلقاو ؟
نلقاو الشركة الي عاملة قناة نسمة والي هي مسجلة في لكسمبورغ عندها برشة فلوس في كونت البانكة متاعها في لكسمبورغ، وبالفلوس هذيكا تشري في برامج ومسلسلات وخدمات من ثلاثة شركات في تونس، وهالشركات لكلها على ملك نبيل القروي !!
يعني نسمة متاع القروي تشري في خدمات من عند شركات متاع القروي !!!
علاش هالدورة البعيدة ؟!!
وعلاش القروي يعمل في التعقيدات هذي لكلها ؟!!
زعمة اش يحب يخبي ؟!!
يحب يتهرب من دفع الضرائب ؟
ممكن …
لكن موش هذا برك.
اذن علاش هالحكاية هذي !!!
نبيل القروي ما جاوبش في التحقيق على زوز أسئلة وبقاو معلقين لليوم:
- علاش هالعملية المعقدة الي انت تعمل فيها ؟
- منين الفلوس الي في كونت لكسمبورغ متاع نسمة ؟
طبعا مسألة التهرب الضريبي تحصيل حاصل وما تحتاجش لمعطيات اضافية، اما باش نفهمو حجم هالتهرب هاذا يلزمنا نفهموا الي المسالة تتعلق بعشرات المليارات.
يعني في تهمة التهرب الضريبي نبيل القروي مطلوب في حوالي 60 مليار مليم للدولة التونسية، وربما بعد التدقيق يكون المبلغ اكثر بكثير.
خلينا من هذا، كيف ما قلتلكم التهرب الضريبي هو الموضوع الأسهل في الحكاية.
أما علاش سي نبيل تعمل في هالدورة المعقدة والكبيرة !!!
كي انت عندك فلوس في الكونت متاع نسمة علاش ما شريتش بشكل مباشر ومشيت لهالطرق الملتوية ؟!!!
نبيل القروي لا يجيب …
في الواقع المسألة بسيطة وواضحة، والجواب بديهي في الحالة هذي.
نبيل القروي ما يحبش الدولة التونسية تعرف اش عنده في كونت البانكة متاع لكسمبورغ …
وعلاش ما يحبش ؟
لانه لا يستطيع ان يثبت مصدر هذه الأموال …
اذن القضية الأخطر هي تهمة تبييض أموال، والأخطر منها هو اثبات مصدر هالاموال ؟!!!
التبييض اذن تهمة أخطر من التهرب الضريبي ولكنها أقل خطورة من التهمة الثالثة …
زعمة الفلوس هذيكا شنوة مصدرها ؟؟؟
تجارة سلاح ؟ تجارة دولية في المخدرات ؟ بيع أعضاء بشرية ؟ أي تجارة إخرى ممنوعة ؟!!!
لالا ، أخطر من هكه …
منذ 2014 وعلى امتداد مدة طويلة، كان يتصب كل شهر في حساب جاري ببنك لكسمبورغ ولصالح قناة نسمة مبلغ مالي شهري يقدر ب2 مليون أورو، يعني أكثر بقليل من 6 مليارات تونسية !!!
اكثر من 6 مليارات كل شهر تتصب في حساب بنكي لنسمة في لكسمبورغ، زعمة منين ؟ وعلاش ؟
المسالة ما تحتاجش لكونان باش يحل اللغز، اما فقط الذهاب للحساب الجاري لنسمة في لكسمبورغ لنكتشف ان صندوقا تمويليا عملاته جمعية على راسها شخص يحمل الجنسية الفلسطينية هو الذي قام بتحويل هالمبالغ الكل.
جمعية رئيسها فلسطيني يصب لنسمة 6.5 مليارات كل شهر، زعمة منين وعلاش ؟!!!
هالفلسطيني هذا تبين الي هو واحد من جماعة محمد دحلان ويتردد كثيرا على دولة خليجية معروفة بأنها وكر الثورات المضادة.
بل تبين بكل وضوح ان الجمعية هذي تمولها الامارات وتستعمل فيها لنقل أموال لصالح جهات معينة أخرى أيضا في تونس، وليس فقط لقناة نسمة …
زعمة ينجم نبيل القروي يقول هذا ويقر بيه !!!
ما ظاهرليش …
أما قلو تعرفش تسرق قلو ايه، قلو باهي تعرفش تخبي قلو لا …
