الان في المنستير : ” لحمت ” بين اعوان السجون و الاصلاح و الأمن و تعزيزات امنية للسجن
علمت الجرأة نيوز ان تصدّع يقع حاليا بين اعوان من الامن و اعوان من السجون و الاصلاح بسبب التداخل بين الجسمين المهمين في دواليب امن البلاد و حفظها .. و قد باشرت وزارة الداخلية الى ارفاق تعزيزات امنية قصد المحافظة على امن الجهة وتأمين حماية المساجين و خاصة السجن المدني بالمسعدين …
و يذكر ان اعوان السجون و الاصلاح من خلال نقابتهم الاساسية عبّروا عن امتعاضهم من التداخل بين الوزارتين و اصدروا تدوينة على مواقع التواصل الاجتماعي جاء فيها :
“من اول ما بدلنا مشيتنا ولا عاد نعرفوا رواحنا اولاد شكون … وزارة العدل في الشهرية والأمور الإدارية… ووزارة الداخلية في القوانين والترقيات وطرق تسيير العمل … ومن وقتها ذبحنا واهدر دمنا بين الوزارتين
يوم تطلب حقك في موضوع يحلوا عليك الكتاب الي يساعدهم ويقولولك الوزارة الفلانية تقول عكس كلامك ..
الحاصيلو من غير ما نطول عليكم… آخر البدع كانت في الساعات الإضافية… يعني بعد ما صدعولنا رؤوسنا بلغة يصبوا للداخلية نصبولكم… ولغة الباران الي يتطبق على الداخلية ينطبق عليكم… تفاجانا منذ يومين ببدعة جديدة طلعوا بيها فطاحلة التسيير الإداري ومديري السجون … إذ بعد زملائنا الملحقين بديوان وزارة العدل.. و زملائنا من أمن المحاكم الذين تم حرمانهم من منحة الساعات الإضافية والبريمة فيهم تحصل على منحة ما تساويش ” رشوق في طهور”
طل علينا مديري سجني الهوارب ومرناڨ بعقوبة جماعية لزملائنا الاداريين وحتى من العاملين بمصلحة العمل العام وذلك بحرمانهم جزئيا من هذه المنحة بدعوى انهم ” يخافوا” من حساب ربي ويخافوا من إهدار المال العام !!!
آش قالي… آش قتلك… عمرولهم السوايع ناقصين !!
مانيش بش نحكي على منحة الالزام الي يأخذوا فيها حرام ” زقوم” والبريمة فيهم يحضر في قعدات وسهرات و” بلعات” وشيخات اكثر ملي يحضر لبيروه
ومانيش بش نحكي على المسكن الإداري ” بلوشي” والكهرباء والماء والغاز والمواد الغذائية واللحم والدجاج و… و… كلو بلوشي
مانيش بش نحكي على السيارة الي تنقل الصغار من والى المدرسة والمدام للحجامة ولدار قريبتها بش تهنيها في النفاس …
لا هذا الكل ماهوش إهدار المال العام وما هوش مخالفة لشرع الله
آما نحب نحكي على الخطط الوهمية التي كانت مسندة لعدة اشخاص قبل هذه الصائفة مثل مدير سجن زغوان ( والسجن مسكر) ومدير سجن بلي ( والسجن لتوا ما كملش) ومدير إدارة فرعية باقليم الجنوب ( والراجل ماشي جاي على قطر ولا نهار حط ساقيه في ها الإقليم الي معين فيه) وبقية شلة العمداء باقليم الساحل الي من شهر رمضان لشهر رمضان يعملوا تفقد والاقليم لا وجود له يعني يباشروا من بيوتهم وبقية العمداء باقليم تونس كيف كيف.. والعمداء الي بالإدارة وفيهم شكون يباشر في العمل وهو في الأصل يخدم بالمغازة متاعو بحمام الشط ومركي على الإدارة و… و…
هاذم فلوسهم تتصب كاملة وفوقهم منحة الانتاج 100٪
فبحيث الإيمان والتقوى والورع في إدارتنا ما يصيبوا كان الزوالي والي يخدم على روحو ولا يهمو في مدير فضيحة قفصة ولا مدير فضيحة الهوارب ولا مدير فضيحة التحرش ولا… ولا … و بالرسمي نقولها… العيب موش فيكم… أما العيب في الي لتوا ساكت وصابر عليكم.”
هذا و يحتاج الامر الى مزيد ضبط النفس و التحرّي بروح وطنية عاليه لكلا الجسمين حماية للبلاد و مكتسباتها فضلا عن كون الامر يحتاج الى تدخل من اعلى هرم السلط قصد تحديد الوزارت المشرفة دون لخبطة او تداخل …
