الاستاذة مايا القصوري :”الي يقلها نحّي بوسطوك نرشق عليك …و المسّان بأكثر فلوس ..”

كتبت الاستاذة مايا القصوري ما يلي :

نعتذر علىً بشاعة الصورتين..الصورة الاولى من مخزون صور الفترة الاستعمارية في العالم الي ازدهرت فيها ممارسة اسمها “حدائق الحيوان البشرية” ..تمثل التصويرة أمة من افريقيا السوداء اسمها سارة اعجب بيها (اعجاب تجاري طبعا) دكتور بريطاني لكبر عجيزتها الخارق فقاللها ايجا اهرب معايا و تولي غنية و تتحرر..كيفاش ؟ ينصب بيها في المهرجانات و الطبرنات و الشوارع و توري هي عجيزتها..فكان ذلك كذلك ..دار بيها اروبا الكل ..هي عريانة و الناس تجي تتفرج و يقولولها ترى تكلم ترى دور ترى تكيف ترى غني و حسب طاعتها يرشقوا عليها كل قدير و قدروا..المسان زادا كان ممكن اما لازم تدفع اكثر و اكثر من المسان أصبح ممكن زادا اما باكثر برشا فلوس (و في المقصورة مش قدام الناس )خاطر الدكتور الي يخدم بيها اقنعها الي لازم يدوروا الدولاب اكثر و زادا خاطر سارة ولات الكوليك من الهم الي لقات روحها فيه .. زمانها جات جمعيات مناهضة العبودية و شكات و ربحت الشكاية اما سارة قالت لا انا نعمل في الشيء هذا بمحض ارادتي..سارة ماتت فقيرة الكوليك في باريس و حكايتها ولات مثال يتحكى على فضائع البشرية قبل ما تظهر مثل حماية الكرامة البشرية و منع الاتجار بالبشر و منع العبودية و حدائق الحيوان الادمية ..وًمن بعد جات الحركة النسوية الي خذات حكاية سارة كمثال على فضاعة تشييء المرأة و قصرها في جسد و ووسيلة جنسية …احنا هكاكا وًجا تيكتوك وليت عاد تلقى نساء كيف سارة (اما هوما على الاقل مش اماء)حاطين رواحهم فوق مدار افتراضي الي يقلها مرغ روحك بالفارينة و نرشق عليك الي يقلها نحي بوسطوك و الي قاعدين عاملين حلقة مع راجل يحكيو على ادق ممارساتهم الجنسية (هذم كل شفتهم بعينيا و دخت )عالخاطر فهموا الي قد ما تهبط في النيفو و قد ما تستفز الغرائز قد ما الرشق يقوى و عاد ولى التيك توك هذا اش يكون يتمرغ اكثر في الوحل بش يعجب احفاد فصيلة الناس المرضى الي كانوا يرشقوا على سارة و يقولولها ترى طبس أكثر .. تجي تتكلم تقول رجعتونا لعهد سارة يقلك خليهم يسترزقوا و هذا اقتصاد جديد و هاو الاعلام يحتفي بيهم وولاو ستارات..اي امالا توا كيف كل حاجة ولات تبرر الاسترزاق هيا نفرحوا بالدعارة و هيا نفرحوا بلي يتاجروا بيها و هيا نفرحوا باللحامة و نفرحوا بالنطارة..ماو كلو استرزاق..اليوم تيك توك اصبح منصة متع اتجار بالبشر..تقولولي كل واحد حر في روحو نقلكم اقراو القانون تاو تعرفوا الي القانون يحميك زادا من نفسك و القانون زادا يحمي المجتمع و خاصة القصر من مثل هذه الفظاعات..الصين بلاد تيك توك ميسقتوا على الشباب في حدود اربعين دقيقة ..وًنحن ؟ الى متى حديقة الحيوان البشرية هذي ؟