مايا القصوري :” تعديت نعمل في تعنيقة …شدّتني الغصّة “

قالت الاستاذة مايا القصوري :” نقضي في شوري في نهج الجزيرة قلت هيا نتعدى نعمل تعنيقة لليسي نهج روسيا من باب الحنين ..نلقى باب الأساتذة مشقق ، دخلت و قلبي يدق بلقوي خاطر سنين و منين نحلم بش نرجع ندخلوا و ما واتاتش..نحلم بالمكتبة الي كلها طيق لوح بلنز يلمعوا معبين باحسن الكتب و شيمينية و تابلوات قدم في الحيوط و بلاسال دو موزيك الي كانوا فيها زوز بيانوات و الات و شيمينية و سي المديوني و لاسال دو ديسان فيها مدام محرزي تصلحلي في النمر المسود الي صورتو و تقلي:” النمر سلس..نقص في الكرش ” و بلاسال دو كوتور وين كانت مدام بودن بملاحتها تحاول تعلمنا السورفيلاج المرتوب على بياسة عنبرقيز و انا عقوبة الله في الخياطة نعطي للمحيرصي تعمل في عوضي و نقلها نعملك الريداكسيون و بهاك الكلورات الي حيوطهم مرمر ويعديو كرهبة….الفيديو الاولى الي تشوفوها هي في ما اصبحت عليه المكتبة.. سي فيصل العبيدي المدير قالي بكل حزن معاد حد يجي يتسلف كتاب..التابلوات الي حكيتلو عليهم ما لقاهمش كيف شد الخطة كيما المرمر الي في الحيوط ..نحاوه و عوضوه بدهن رمادي..السقوفات شطرها خايخ كيف تصب الشتاء تقطر..لاسال دو موزيك معادش اما قعدوا البيانوات شاهدين…لاسال دو كوتور معادش و كذلك لاسال دو ديسان الي تم الحاقها بالمدرسة الابتدائية خاطر طاح جزء منها …حرام انو بنية مهيبة و عندها تاريخ كيف معهد نهج روسيا الي هو مؤسسة تعليمية من عام 1903 يلقى نفسو اليوم في وضعية كيف هذي من نقص الاعتمادات تخلي المدير رغم ارادتو الصادقة ما عندوش حتى بش يصلح سقف..و هذا مش دور الدولة برك خاطر الدولة عندها زادا مكاتب ابجل من حيث الوضعية ..دور القدماء لازم يتوجد كيف قدماء الصادقية ..المانحين من بنوك و غيرو زادا من جمعيات الي تحب تعمل السياسة السياسوية بالاورو.. الاورو عاونونا بيه في المكاتب الخايخة كان تحبوا تعاونوا بلحق ..خاطر و الله عيب بنية كيف هذيكا تمشي كيما مشاو برشا بنيات كانوا روح البلاد