قصة ركّاب المترو رقم 6 مع السائق :” يعطيك الصحة و يرحم والديك و ربي يكثّر منك الناس “

تداول ركّاب المترو رقم 6 الرابط بين برشلونة و المروج قصة  هذه فحواها ننقلها كما هي :”

البارح العشية في ميترو6 في المروج اول ما وصلنا لل terminus الشوفور تكلم في الميكرو و قال سايسو رواحكم و ليلتكم زينة الناس الكل . من غير مبالغة والله كأنو عصا سحرية و مست كل عبد راكب في الميترو اللي كان مكشبر تبسم و اللي كان راقد ع الشباك فاق ولى يضحك و اللي كان متغشش ضحك .و الناس الكل تجاوب فيه يعطيك الصحة و يرحم والديك و اللي يدق عليه في الشباك و يقلو ربي يكثر منك الناس . و عود ديما انت سوق بينا

كمية الفرحة اللي القاها بمجرد كلمة والله لا توصف . من بعد كي نجيو نخممو نلقاو علاش الفرحة هذي الكل على خاطر كلمة تصبحو على خير … على خاطر ستانسنا بشكون يصيح و يعيط و يكش في وجوه الناس صباح و ليل و قايلة في كار ولا ميترو ولا بوسطة ولا سبيطار .. لدرجة انو كي عبد يقول كلمة تفرح نبهتو و تكون حاجة تفاجئنا .. على خاطر ماناش مستانسين نفرحو احنا بش الناس اللي دايرة بينا تفرح .

إن شاء الله موقف كيف هذا يتعاود برشا حتى تولي عادة من عادات كل تونسي”