شاهد عيان يروي تفاصيل عملية جربة
![شاهد عيان يروي تفاصيل عملية جربة](https://aljoraanews.net/wp-content/uploads/jerba-.jpg)
كمال رمزي الشواشي شاهد عيان نجا من الموت في الغربية يروي تفاصيل العملية الاجرامية :
هاو لي صار كيف ما عشته تقريبا : كنا قاعدين في الغريبة وتقريبا الساعة سبعة قلنا هيا نخرجو نعملو دورة نمشيو نتعشاو مازلنا كيف خرجنا وصلنا على مستوى البركينغ وبدأ الكرتوش يخيط نشوف في الطلق الناري جاي مقابلنا والشرطة والحرس والجيش بداو يجريو وامنونا في مزرعة زيتون على الارض واحد منهم مسكين تضرب طاح على بلاصته الله يرحمه انا ترميت على الارض ركبتي جات على حجرة لكن الحمد لله لاباس شويا ترضريض وبرا. قعدنا فترة تقريبا نصف ساعة الكرتوش يضرب. بعدين هزونا جري وزحف تخبينا تحت سيارات الحماية المدنية والرصاص مرة يضرب مرة يقص.
بعد تقريبا ساعة قالونا ادخلو لداخل الغريبة غادي امان احنا عند الباب ورجع الضرب ونسمع في واحد من الامنيين يقول لزملائه قناص قناص قناص الظاهر والله اعلم انهم قتلوه وبعد دخلنا لداخل وكان المكان آمن.
وغادي بصفة اني كنت في ساحة المعركة جاوني صحفيين يسألوا فيا على الوضع قلتلهم لاباس ما فما شيء الأمن مسيطر على الوضع و تقريبا الساعة 11 بداو يخرجو فينا تحت حماية مشددة. في الباصات والسيارات. وقالو انه فيه تقريبا 4 امنيين تضربو وزوز مدنيين تونسي وفرنسي
المصدر : الصفحة الرسمية للمحامية وفاء الشاذلي