بكاء أستاذة مراقبة لامتحانات الباكالوريا …ما السبب ؟
![](https://aljoraanews.net/wp-content/uploads/bac-18.jpg)
منقول عن أستاذة مراقبة لامتحانات الباكالوريا …
خسارة و ألف خسارة
اليوم وفات عسة الباك الدورة الأولى و بالطبع نتمناولهم النجاح ، لكن قلبي تعبى و فاض و نحب نخفف عليه شوية.
نحب نقول أن الباك ماعادش عندها هاك الهالة من القداسة الي كانت يا حسرة تهيمن عليها ، يظهر ذلك في أبسط الحاجات و أهمها التلميذ نفسه: أبدأ من هيأته ، اليوم عسيت على 14 تلميذ في القاعة ،5 منهم بشلايك بلاستيك متاع بحر و فم سراول بيجاما و شوارط ( طوال الحقيقة ) و بنات بكروش و ظهورة عرايا ، يعني حسيت مناش في مؤسسة تربوية بل في الشارع . التلامذة في وسط الامتحان يطلبو من بعضهم في أدوات مدرسية ( بالطبع تدخلت و منعت ذلك ) ، التلامذة جايبين أنواع مختلفة متاع بشكوطو و حلويات منها الي بالشكلاطة و تنجم تمسخ أوراق الامتحان و أكثر من ذلك يحبو يتبادلوها بين بعضهم وسط الامتحان ، التلامذة تتواصل مع بعضها ( كيف منعنا كمراقبين الكلام ) يتواصلو بالحركات و بملامح الوجه و بطرق مختلفة حتى قدام الأساتذة ! التلامذة يطلبو الخروج الاضطراري باش يدخنو خارج القاعة أو باش تمشي تغسل وجهها ( مع العلم أن الفرض ساعتين فقط ) ، يعني تلميذ ما يركزش ساعتين من زمان !!!
فم قلة انضباط كبيرة و تسيب مهول و في المقابل تهاون من المسؤولين و خوف متزايد على التلامذة أو على رواحهم ( و الله ما نعرف) و هذا ما ينجم كان يزيد في تدهور حالة التعليم في بلادنا للأسف الشديد.