الاعلامي محمد بوغلاب :” وليت بطال …ودقيت باب الاذاعات ومالقيت حتى جواب”
![](https://aljoraanews.net/wp-content/uploads/309541702_1711912982542015_5515322312802036122_n.jpg)
كتب الاعلامي محمد بوغلاب ما يلي :” السنا مانيش في شمس ولا في إذاعة أخرى لا لولى لا لخرة ولا أم الاذاعات ولا ربيبتها … دقيت البيبان بعد مافهمت إلي موش ممكن نواصل في شمس إذاعة مصادرة جناحها مكسور والهايكا عاملتلها ماركاج … دقيت البيبان واتصلت ببعض الاذاعات والكلام رزين على لساني وأنا نقلهم راني وليت بطال ومانيش نادم أني كلمتهم فرصة اضافية باش تعرف الناس وباش مانلومش روحي مبعد … دقيت الباب ومالقيت حتى جواب … فما زوز اذاعات كلموني وتفاهمنا في كل شي بقات تفاصيل في حكاية العقد والفلوس وقالولي توا نرجعولك ومارجعلي حد … بيناتنا وين المشكل كان نغيب على الإذاعة ونشد الدار باش تطيح لقشمة من السماء ؟ بالعكس السماء زرقاء والعصافير تزقزق … قالولي تعليمات من الفوق وماتخدم في حتى بلاصة … جماعة الفوق نحب نقلهم برشا قبلكم كانوا الفوق واغزروا حواليكم وشوفو وينهم … قنوات تلفزية تحرم عليها تحكي في السياسة لا بالتلميح ولا بالتصريح وإذا تحكي يلزم تكون من معتنقي الديانة الجديدة متاع 25 جويلية وتضرب البندير على قوة جهدك … احنا اليوم في تجربة جديدة ما اخترتهاش ، نعتقد أنو سكاتي ما تربح منو لبلاد حتى شي … لو نسكت يمكن نموت ساكت بالقهرة … مازال فما مايتحكى ومازال عندي مانقول”