الاعلامي محمد بوغلاب “زايد، وجوه مغسولة بالبول حاشاكم..”
برشة ملي يسبو وكشاكشهم طالعة وين كانو وقت البرنس فحج ع الكورة ؟ وينهم وقت عمل كل شي وما خلاش التلفزة تعدي الماتشوات؟
شيبهم سكتو وقت طيح الشابة؟ وينهم وقت البطولة ريحتها فاحت بالبيوع والشراء؟ وينهم كي البرنس يبدل في المدربين كانو يبدل في كلاصتو ؟ في ١٠ سنين 10 مدربين؟ وينهم وقت يعين الفاشل وخوه في تدريب المنتخبات ؟ شكون يعرف المدير الفني متاع الجامعة؟
شبيهم سكتو وقت كمبن لطارق بوشماوي لحساب لقجع؟ من بعد يتباكاو على ضياع حقوق المنتخب وما عناش شكون يدافع علينا؟
شبيهم. ما قالوش تحكيمنا فاسد هذاكة علاش ما ثمة حتى حكم تونسي في بطولة افريقيا للامم؟
شبيهم بلعو لساناتهم وقت وديع يحكم بالشكال والعقال؟
مرة حكيت ع البرنس في برنامج تلفزي حضرت كضيف، كلامي الكل تقص، الي وقفت ع المونتاج منشطة تلفزية واذاعية معروفة ما عندها حتى علاقة لا بالبرنامج ولا بالرياضة، اما واضح انها تكوّر مع مولى الكورة،
وصل الحال الي ضد وديع ما يتعدى تقريبا في حتى اذاعة وفي حتى تلفزة ،
برشة وسخ في كورتنا، هذاكة علاش ما تلقاش فيها ناجي الجويني ولا اي ملاعبي. من نجوم المنتخب قبل، وينو شكري الواعر وزبير بية؟ وينهم تميم الحزامي والهرقال وحامد كمون وخميس العبيدي ؟ علاش صحافي في قيمة محمد الكيلاني غائب تماما عن المشهد الرياضي؟ لانو ببساطة ما يعرفش يسرح بالكلب ، الجامعة تعبات بالمحامين والقضاة في اللجان، شبكات مصالح لا تعرف اولها من اخرها،
اخرتها واحد م العكعاكة المستفيدين م السيستام قال حقهم اجلو قضية البرنس لما بعد الكأس لانو برشة ملاعبية تلعب من اجلو هو(
علاش ؟ يخلص فيهم من مكتوبو ؟ يسقيولو في الجنينة؟
زايد، وجوه مغسولة بالبول حاشاكم
جامعة تحب تعمل وكالة اسفار ، ناقص تنظم العمرة ،
يحشيو فيه، يغطيو في وسخهم، قال شنو ة يصليو ويعرفو ربي( وقدر الله ما شاءفعل)
اخطاوه ربي،تعرفوه انتوما؟
ملاعبي من الكبايرية ايامات قبل السفر للكوت ديفوار ساهر مع الحبق في قمرت،
اعلام رياضي جله متواطئ ، عين رات وعين ما راتش
الي سكت قبل ع الفساد ، يكمل يبلع فمو توة، موش من حقو يفتي،
برشة ترهدين وبرشة طحين
