يهددهم بسكين و يفتّك أموالهم :صرخة شابة تعيش في خطر بسبب أخيها البلطجي

توصلّت الجرأة نيوز برسالة  من شابة  تونسية فيما يلي  نصها :” انا شابة تونسية عمري 29 سنة نسكن في تونس بابا متوفي و نعيش مع امي و اختي أكبر مني و خويا عمرو 31 سنة زادا اكبر مني بطال نهار كامل في الدار يبدا يتلكش علي انا و اختي و يتبورب علينا خاطرنا بنات و كي نرجعو عليه أقل كلمة يجبد علينا سكينة و يبدأ يتهدد و يكفر و يعيط و يقول لما نقتل وحدة فيكم و قداش من مرة يجبد علي سكينة و نهرب من الدار و نبات في الشارع والله خاطر القانا بنات و احنا دارنا على طاقين كل دار وحدها مشى سكرها الدار الفوقانية و قال ميدخللها حد اذيكا داري و عايش معانا في الدار لوطانية و يقوللنا كان عجبكم و كالعادة نرجعو عليه أقل كلمة يجبد علينا سكينة و حتى مع امي يتقبح و بطال و مارجها على الفلوس و كي متعطيهوش يبدأ يكفر علاها و يجبد موس لام و يتهدد بش نشلط و امي تخاف منو منجمتش حتى تعمل شي و هو ميخليهاش تخرج بش متحكيش للجيران بش الجيران و العباد ميسمعوش بيه اش عامل في امو و اخواتو والله تعبنا منو نحب نشكي بيه معرفتش كيفاش و وين باللهي هبطلي مشكلتي بش أولاد و بنات الحلال يعاونوني خاطر والله مرضني نفسانيا و معيشنا في رعب خاطر القانا بنات معندوش راجل ياقفلو”