ليلى طوبال : «قيس سعيّد طبطب على دمعة شباب مقهور»

كتبت ليلى طوبال :

صباح النور
برشه تمقعير وبرشه تعاليق تافهة و vicieuse عالتصويرة… ماو الفايسبوك ولّى مصبّ كره وتبلعيط وسبّان وبااااارشه خيوبية…
واحد من مجموعة شباب جاو من قفصة على ساقيهم باش يقابلوا الرئيس… يمكن الحوايج الّي لابسينهم أذوكم الكسيبة على خاطرهم بطّالة وعايشين في ميزيريا زرقاء… الهم مطفطف على قلوبهم والدموع ، دموع القهر والاحساس بالظلم والثنية الظلام… يمكن برشه ما يعرفوش آش معناها تبكي بالقهرة على خاطر البيبان الكل مسكّرين في وجهك… وكي رئيس يحللّهم باب قصر قرطاج وحضنو تهبط الدموع… يمكن موش باش ينجّم يعمل شي لتونس الّي تعاني والاّ يمكن يعمل حاجة قليلة… الخراب يلزمو برشه وقت وبرشه جاش وبرشه شرف باش يترمّم… بيبان قصر قرطاج الّي تحلّت يمكن ما تحلّش مشاكلهم … آما بعد ساعات كلمة تشفي العليل… موش هكّة يقولوا… كي ما تنجمّش تعطيني… اسمعني… افهمني… حسّ بيا وما تحقرنيش… أنا تونسي كيفي كيفك ما تحقرنيش … أنا زادة من حقّي نعيش …
التعنيقة يمكن تعطيه طاقة باش يقاوم… باش ما يسلّمش… باش ما يحرقش ويتعشى بيه الحوت… باش ما يسكّرش كيّاس باش ما يطلعش للجبل ويهزّ السلاح…
لكلنا نقوموا الصباح نفركسوا على تصبيحات على وردة على ريحة قهوة على كلمة حلوة باش نبداو نهارنا ونواجهوا صعوبية الدنيا… قيس سعيّد نقّل علينا وطبطب على دمعة شباب مقهور

x

‎قد يُعجبك أيضاً

سليانة: قيس سعيّد في زيارة فجئية لمعهد الكريب

أدّى رئيس الجمهورية قيس سعيّد، صباح اليوم الأربعاء 20 نوفمبر 2019، زيارة فجئية إلى معهد ...